საელჩოს სიახლეები

სტუდენტური გაცვლითი პროგრამების კურსდამთავრებულები იკრიბებიან განათლების სფეროში მიმდინარე რეფორმების განსახილველად და საქმიანი კავშირების აღსადგენად

2006 წლის 24 ნოემბერს საერთაშორისო განათლების კვირის აღსანიშნავად ღია დისკუსიისათვის შეიკრიბნენ განათლების სფეროს მუშაკები, მათ შორის აშშ-ის მთავრობის გაცვლითი პროგრამების მონაწილენი, რომლებიც აქტიურად არიან ჩაბმულნი ამ სფეროში. განათლებისა და მეცნიერების მინისტრის მოადგილე და ამავდროულად უნივერსიტეტის ლექტორთა განვითარების პროგრამის კურსდამთავრებული ქ-ნი ბელა წიფურია პასუხობდა კითხვებს ახლად გატარებული რეფორმების, უნივერსიტეტების აკრედიტაციის, სასწავლო პროგრამების განვითარების, სასკოლო სახელმძღვანელოების შექმნის, ერთიანი ეროვნული გამოცდების, სტუდენტთა დახელოვნების სკოლების და სადოქტორო პროგრამების დანერგვის შესახებ. უმაღლესი სასწავლებლების აკრედიტაციის დეპარტამენტის თავმჯდომარე ქ-ნი ნინო ჩუბინიძე (Muskie-ის პროგრამის კურსდამთავრებული) აქტიურად ჩაერთო დისკუსიაში. ეს ღონისძიება არაჩვეულებრივი შესაძლებლობა იყო მოწვეული სტუმრებისთვის, რომ გაცნობოდნენ გაცვლითი პროგრამების კურსდამთავრებულებს და განათლების სფეროს ექსპერტებს.